2017年1月29日星期日

蘋果日報- 網民惡搞林鄭 - 左丁山

蘋果日報- 網民惡搞林鄭 - 左丁山

網民惡搞林鄭 - 左丁山


膠登音樂台截圖

林鄭月娥做官時,形象本來不錯,冇八十分都有六七十分,點知臨危受命,紅袍加身之後,民望即時插水,大落後於曾俊華,令一啲林鄭粉絲大感不平。左丁山在2012年特首競選時,屬於挺唐派,但當時有不少老友係挺梁派,當時問過中大學生Y,學生挺唐或是挺梁呀?佢話絕大部份挺梁,主要原因係梁振英出身於平民階層(與中大學生大多數相同),成為成功專業人士,做得嘢,不比唐英年係富二代貴介公子只識飲紅酒;左丁山叫學生Y睇嘢唔好淨係睇表面,但毫無作用,青年學生多是梁粉,梁振英民望不斷上升,超越唐英年,更得高人扶持,說服中央棄唐取梁,於是梁振英成為特首。

今天再問番已變成銀行主任嘅學生Y(可稱為小賓架Y),佢已經係一位逢CY必反嘅黃絲帶,為咗避免刺激佢,左丁山費事多問五年來佢嘅心路歷程。拜年時見到學生豪,問佢中大有冇林鄭粉絲呀,佢話未見過,可能係識得人少啩,反而碰到眾多薯片叔叔粉絲,學生豪講:「成個校園都反梁,林鄭係CY指定繼承人咁款,點會有年輕人撐佢呀,林鄭連facebook專頁都唔敢開呀。」

咁講法,林鄭大概好難在年輕人群組中爭取民望,搵五年前唐英年競選得力助手劉鳴煒幫手亦冇辦法,林鄭嘅競選大公關戴建文與Sandra Mak都係六十歲人物,當然亦與青年脫節,而且兩人都好似冇競選戰嘅打仗經驗,唔似得幫CY競選嘅Fanny Wong咁巴辣。

葉劉參選,粒粒皆辛苦,自己逐票逐票搵,過年前話搵到二三十張提名票,網民二次創作徐小鳳流行經典「順流逆流」網上廣傳,聽完都幾同情葉劉呢位苦命堅強的女人。林鄭宣佈參選後,第一個星期嘅政治公關「肥佬」(信報余錦賢話嘅),俾網民二次創作惡搞改編王菲及中島美雪嘅名曲「容易受傷的女人」為「渴望成為特首的女人」,傳到街知巷聞,左丁山咁老餅都收到,聽完覺得對林鄭幾殘忍,林鄭在網絡世界輸幾十條街,完全淪為惡搞取笑工具,原來成為CY 2.0之後,會咁惡睇嘅。民望墮後又如何,唔駛驚,葉劉講林鄭:「佢瞓喺度都入到閘」,以前又話過有人食殘廢餐,果然口舌不饒人。林鄭唔駛驚吖,總有人護航。1月21日大公報關昭專評:「民意非選特首唯一標準」,大家明白晒啦,2012年就講民意重要,因為CY領先,今天係薯片叔領先噃,唔講民意嘞!

上一則: 防左與抗右 - 陶傑

下一則: 全球最貴福氣,699元一支香 - 林夕



I

没有评论:

发表评论