2017年2月6日星期一

蘋果日報- 大肆干預必失敗 - 左丁山

蘋果日報- 大肆干預必失敗 - 左丁山

大肆干預必失敗 - 左丁山


美聯社圖片

特朗普對好多人嚟講,係一個肯做事嘅大有為總統,一入白宮就日日簽署新柯打(總統行政命令):建墨西哥邊境圍牆,廢除醫保法案,興建油管,禁止氣候變化宣傳,向墨西哥貨品徵收邊界稅20%,停止撥款反對佢移民政策嘅新城市……總之好似開機關槍咁,連珠炮發,令民主黨透不過氣來,仲未能組織一場反擊戰,反而大多數傳媒繼續嘲諷特朗普作風,成為白宮眼中釘,白宮首席顧問班農大罵傳媒係「反對黨」,乜咁似香港特區政府嘅?

特朗普還要干預正常市場運行,責成大公司CEO將職位帶回美國,停止外判(outsourcing)及在外國設廠,自稱會成為美國歷史上創造最多就業職位(2千5百萬)嘅總統。咁巴閉,得唔得呢?從過往幾十年經驗睇,特朗普呢套多數會肥佬收場,徒勞無功。近啲睇,委內瑞拉已故總統查韋斯係一個左派社會主義特朗普,任內驅趕外國油公司,石油企業國有化,大派福利增加工作職位,搞基建,本質上與今天特朗普政策相同,但委內瑞拉今天難敵油價由150美元一桶下降至50美元一桶,加上國有化民間企業之後,效率大減,冗員大增,今天委內瑞拉已經破產,人民捱窮,冇錢償還俾中國。

美國富有得多,當然唔會成為委內瑞拉,但美國人工貴過墨西哥八成,廠商將職位帶回美國,生產成本大升,理論上一定推高通脹,唔通特朗普到時實行價格管制?如不加價,美國大公司必然虧本,導致股價大跌,連累華爾街。仲有另外一個方法,就係商人攞晒稅務優惠,不搬廠去墨西哥,但投資於興建最新型自動化,利用機械人嘅工廠,直接結果係唔會在美國開設新職位,反而透過自然離休方法,減少美國本土嘅職位,明呃特朗普。開利母公司嘅CEO對電視台講明會係㗎,唔係老作!特朗普要製造一個順我者昌,逆我者亡嘅強勢領導形象,大商家順晒佢嘅意思攞着數,實際上唔會大力增加美國就業,而且講真,美國失業率已降低至4.6%左右,屬美國全民就業狀態,又唔准大部份新移民入境,美國何來咁多工人呀?但呢個世界,人人識do,風頭火勢之下,冇商家提出問題,只有傳媒成為百彈齋主,亦顯得言論自由、新聞自由之可貴矣。

上一則: 讓子彈繼續飛 - 陶傑

下一則: 試論四大候選人的牌品 - 林夕



I

没有评论:

发表评论