2017年3月24日星期五

空洞寫字枱 - 左丁山 | 2017-03-24 | | 蘋果日報

空洞寫字枱 - 左丁山 | 2017-03-24 | | 蘋果日報

空洞寫字枱 - 左丁山

左丁山嘅寫字枱,十幾年來都係亂七八糟,堆滿舊剪報,過時雜誌與自網絡下載嘅打印文章,再加上一啲字典、辭典,成張枱只有一張A3紙大小嘅空位,俾左丁山用作寫稿及閱讀之用。一次公關大姐大上嚟睇到,對左丁山秘書講:「乜你唔同老闆執吓張枱?」秘書話:「此乃禁地,只有左生知道啲資料放在那裏,我唔敢掂。」
於是見到林鄭在競選論壇講及佢「羨慕」莊曾張辦公枱空無一物,而自己張枱堆滿文件,不禁失笑。林鄭果然係溫室裏長大的小公主,見識及身而止,誠如莊曾反駁,呢位小公主最啱做勤力下屬職員,不宜做特首領道群倫。啲領袖級人物,邊度會將文件夾放在自己寫字枱,以示勤力㗎!左丁山叫做做過三四年大機構阿頭,嗰陣時就係辦公枱上最乾淨企理嘅時候,後來自己做咗小老闆,冇人幫手,樣樣要自己親力親為,先至搞到寫字枱亂晒籠嘅箒。
投資A與林鄭係港大校友,畢業年份相差兩三年,在港大時不時見面,聽到林鄭咁講,搖頭話:「Carrie見嘢比較少,一畢業就入政府打工,可能因此冇乜世界觀,唔知外面發生乜嘢事。」投資A之大老闆董事長就係唔放文件在辦公室嘅,寫字枱上除咗電腦及一個legal pad及幾枝原子筆外,就空無一物。佢問左丁山見過咁嘅老細未?當然見過啦,三十幾年前,著名酒店投資家Zecha先生在東昌大廈有寫字樓,佢間房入面,乜文件都冇,寫字枱其實係一張設計師訂造嘅四腳寫字板,下無一物,空空洞洞,去見薩加先生,就係我地匯報,佢批評質詢之後就下決定,寫記錄係左丁山,跟進工作嘅有佢嘅夥計。呢呢,薩加先生就係著名麗晶酒店創辦人之一,與左丁山所屬嘅投資公司一齊創辦,至今聲譽不衰嘅Aman Resort,例如Amanpuri(蔡瀾先生最鍾意帶團去住嘅極高檔連鎖渡假酒店),胡定旭先生當年就係佢嘅核數師。領袖人物係要嚟做大決定,大策略嘅,那會因為自己寫字枱上多文件夾而用以驕人?林鄭十幾年來形象唔錯,幾惹人歡喜,但自展開競選特首活動後,其言行日益顯示佢係一個勤力EO,聰明AO,並非政治領袖,一個標準讀書叻嘅港大產品,欠缺國際視野及中國國情和人文學養,不懂港大師兄洪清田成日講嘅多元對立思維,直情係一個容易操控及聽話嘅夥計,唔怪得中央欽點佢!



Z88

没有评论:

发表评论