2017年8月19日星期六

世外關島 - 左丁山 | 2017-08-19 | | 蘋果日報

世外關島 - 左丁山 | 2017-08-19 | | 蘋果日報

世外關島 - 左丁山

北韓恐嚇美國,話可以用導彈襲擊關島,令寧靜和平嘅關島突然成為新聞,不少國際記者特登飛去關島採訪。上星期吃午飯之時,地產F自認關島專家,原來唔係講笑,佢年青時為家族生意,在關島住咗五年,曾建議創立關島銀行,非常成功,關島大學頒咗一個榮譽博士學位俾佢。因是之故,聽到北韓可能攻擊關島,地產F面有憂色,因對關島有感情也。
香港一間上市公司(311)「聯泰控股」,係一間巨型紡織集團公司,每年營銷額在10億美元以上,主席陳守仁博士嘅博士銜,就係由關島大學頒授嘅榮譽博士,佢位公子陳祖龍係聯泰控股總裁,係關島大學工商管理系畢業生,陳氏家族在關島除擁有紡織成衣工廠外,還持有大量物業包括一啲五星酒店。
十幾年前,左丁山初次去關島旅行,得李純恩介紹,入住君悅酒店,之後再去關島四五次,都係住在靚海灘旁邊嘅君悅。關島面積約等於半個香港,但面積集中在一個大島,駕車行勻全島,比較容易,而人口只有十六萬人,約等於沙田第一城加太古城加美孚加置富花園,可想而知,關島居住環境幾咁舒適。以前有大陸航空(Continental Airlines)晚上由香港直航關島,後來可能乘客不多,取消咗,飛機要先到塞班島,乘客落機再次排隊過安檢,然後上機,令乘客在半夜睡眠當中受到半小時至一小時嘅驚醒、騷擾,幾冇癮㗎。
到咗關島,美國移民官員一概不友善,對遊客黑口黑面,好似「你哋點解要嚟」咁嘅態度,全世界係美國獨有;不過出咗位於山上嘅機場就輕鬆咯,大把租車公司等緊你,租一架車就直去山下海灘,沿海灘馬路行走,便有不少酒店,到呢度就係享受陽光與海灘,與峇里島及布吉無異,只不過係使美金,咁就有啲肉赤嘞。駕車全島遊可探訪二次世界大戰時美日戰場遺址,不少日本遊客專程為此而來,但最大嘅活動係日本男女來此舉行婚禮及婚宴,君悅酒店在沙灘有一小型白色教堂,新娘披上白色婚紗拍照嘅情景夠晒浪漫!其他活動係乜?購物囉,山上離機場不遠有大型商場,內有Macy's百貨,每年夏季大減價,貨真價實便宜到唔講得笑。大隻佬及大肥佬來此買衫買褲,包保有Size,因為當地人似乎人人腰圍44吋以上,香港肥佬瞠乎其後也!當地經濟主要靠美軍消費(美國有海空基地在此)及外國遊客,遠離亞洲大陸,與世無爭,突然之間話可能捲入戰爭,可見世事無常,世上難有真正清靜地。



Z88

没有评论:

发表评论